Umumxalq bayramlari.Mustaqillik bayrami

Mustaqillik – o’zbek madaniyati tarixida yangi davrni boshlab berdi. Istiqlol tufayli sho’rolar davrida taqiqlangan milliy ma’naviyatimiz qayta tiklandi. “Mustaqilligimizning dastlabki kunlaridanoq ajdodlarimiz tomonidan ko’p asrlar mobaynida yaratib kelingan g’oyat ulkan, bebajo ma’naviy va madaniy merosni tiklash davlat siyosati darajasiga ko’tarilgan nihoyatda muhim vazifa bo’lib qoldi” – deb ta’kidlagan edi O’zbekiston Respublikasi Prezidenti I.A.Karimov. Respublikamizda milliy qadriyatlarni tiklash borasida keng ko’lamda jiddiy tadbirlarning amalga oshirilishi – jamiyatimiz ma’naviyati “binosi”ning qad rostlashiga muhim omil bo’lmoqda.

Mustaqillikka erishgandan so’ng, O’zbekiston rahbariyati eng avvalo xalqimiz ehtiyoji, orzu-istaklarini hisobga olib, azaliy bayramlarni tiklashga va istiqlol davri bayramlarini xalqimizning qadimiy an’analiga monand holda shakllantirishga katta e’tibor bera boshladi. Jumladan, O’zbekiston Respublikasi Prezidenti I.A.Karimov Farmonlari asosida “Navro’z”, “Ramazon hayiti”, “Qurbon hayiti” rasman tiklanib, mamlakatimizda keng nishonlana boshladi.

Rasmiy davlat bayramlari bilan birga, “Gul” bayramlari, “Hosil bayramlari” kabilarni ma’naviyatimiz javohirlari sifatida ko’rsatishga intilish bo’lmoqda. Chunki har bir bayram orqali xalq dardi, orzu-istaklari, tajribalari avloddan-avlodga qadriyat sifatida o’tadi.

Yangi davr, yangi mazmun va yangi shakl, an’analarning paydo bo’lishi mustaqil hayotning quvonchli daqiqalarini tantana qilishga imkon beradigan yangi tadbir-bayramlar yaratishni taqozo etadi. Jumladan, istiqlolni sharaflaydigan “Mustaqillik bayrami” hayotimizning bosh qonunini targ’ib etadigan “Konstitutsiya” kuni rasmiy bayram sifatida nishonlanadigan bo’ldi. Endilikda kelajak avlodni tarbiyalashda alohida rol o’ynayotgan sharafli kasb egalari mehnatini ulug’laydigan “O’qituvchilar murabbiylar kuni”, o’tgan ajdodlar yodini esga olishga bag’ishlangan “Xotira va qadrlash kuni” mamlakatimizda keng nishonlanmoqda.

Mustaqillik tufayli, jahon madaniyati ravnaqiga munosib hissa qo’shgan ajdodlarimiz tavalludlarini nishonlash ham an’analaga aylanib bormoqda. Istiqlol yillarida Zahiriddin Muhammad Bobur (1993), Bahouddin Naqshbandiy (1993), Abduholiq G’ijduvoniy (1994), Mirzo Ulug’bek (1994), Najmiddin Kubro (1994),  Feruz (1995), Amir Temur (1996), Imom al-Buxoriy (1998), Ahmad Farg’oniy (1998), Jaloliddin Manguberdi (1999) al-Marg’inoniy (2000) va Moturudiy (2000) kabi buyuk ajdodlarimiz tavalludining yirik sanalari YuNESKO bilan hamkorlikda nishonlandi.

Jahon madaniyatida buyuk me’moriy obidalari bilan munosib o’rin tutgan qadimiy shaharlarimizga bag’ishlangan xalqaro tadbirlarning tantanali bayram sifatida nishonlanishi ham xalqimizni g’oyat quvontiradi.

Qadimiy tarixiy obidalarning keng ko’lamda ta’mirlanishi, Buxoro, Samarqand, Xiva, Shahrisabz kabi shaharlarida, Quva, Chelak tumanlarida yangi me’moriy yodgorliklarning bunyod etilishi, Buxoro, Xiva, Termiz kabi qadimiy shaharlarning 2500 yillik tantanalari yurtdoshlarimizni ham, mamlakatimizga kelgan mehmonlarni ham qoyil qoldirdi.

Istiqlol tufayli xalqimizning ma’naviy qadriyatlari jahon miqyosida e’tirof etila boshlandi. O’zbek musiqasi, teatri, kinosi, tasviriy san’ati hozirgi kunda ham jahon jamoatchiligini qiziqtirmoqda. Xalq ijodiyotining buyuk namunaasi – “Alpomish” dostoni yaratilganligining ming yillik tantanasi, tarixiy merosimiz “Avesto”ning yaratilganligini 2700 yilligiga oid tantanalar ajdodlarimizning bebaho merosiga qiziqishimizni yanada oshiradi. Shuningdek, Vatanimizda “Toshkent kino festivallari”, “Sharq taronalari” musiqa festivali, “Musiqiy – simfonik festival”, “Navro’z” va “Sharq va G’arb” xalqaro teat festivallari, tasviriy sanat bo’yicha xalqaro ko’rgazmlar, xalq ijodiyotining turli janrlariga bag’ishlangan ko’rik-tanlovlar o’tkazish an’anaga aylanmoqda.

Mamlakatimizda mustaqillik yillarida yangicha madaniy tadbirlar kuchaydi, musiqa san’atini rivojlantirishda alohida o’rin egallay boshlagan “O’zbekiston – Vatanim manim!” nomli respublika ko’rik tanlovi, yilning eng yaxshi ijodkorini aniqlashga xizmat qiluvchi “Ofarin” tanlovi, yosh iste’dodlarni rag’batlantiruvchi “Nihol” tanlovi kabi anjumanlar yanada shuhrat topdi. Xalq ijodining alla, yalla, lapar, askiya, katta ashula, dorbozlik, qo’g’irchoqbozlik kabi ko’plab janrlari hamda etnografik folklor jamoalari, ashula va raqs jamoalarining tanlovlari ravnaqiga keng yo’l ochib bermoqda.

Mamlakatimizda yangi sport bayramlari, jumladan maktab o’quvchilarining “Umid nihollari”, litsey, kollej o’quvchilarining “Barkamol avlod”, oliy o’quv yurti talabalarining “Universiada”lari keng shuhrat qozonmoqda.

Sho’rolar davrida taqiqlangan milliy an’ana va bayramlarining tiklanishi xalqimiz milliy o’zligining ulug’lanishiga xizmat qilmoqda.

O’zbek madaniyatiga bag’ishlangan xalqaro anjumanlar xalqimizning badiiy merosini va zamonaviy yutuqlarini vatanimizda va xorijda targ’ib qilishda muhim ahamiyat kasb etmoqda.

Mamlakatimizda bayramlar o’tkazish borasida ibratli ishlar qilinmoqda. Yirik bayramlar (“Mustaqillik”, “Navro’z”) ni tashkil qilish borasidagi tajribalarimizdan qo’shni mamlakatlarda ham foydalanilayotganligi ayniqsa quvonarli holder.

Oilaviy marosimlar sohasid ham istiqlol davrida ijobiy o’zgarishlar sodir bo’la boshladi.

Ma’lumki, marosimlar o’zbek xalq an’analarining asosiy qismini tashkil etadi. Oilaviy marosimlarning aksariyati bolalar hayotidagi muhim voqealarga bag’ishlanganligi uchun ham ular yoshlar tarbiyasida muhim o’rin tutadi.

O’zbek xalqi to’yni g’oyat sevdigan xalq. O’zbeklar umr bo’yi to’y qilaman, el duosini olaman, boshqalarni quvonchimga sherik qilaman degan maqsadda yashaydi. Shuning uchun to’y o’zbek millati hayotida muqaddas hodisa hisoblanadi. Biroq sho’ro davrida o’zbek oilaviy marosimlarining ba’zilari taqiqlandi, ayrimlari esa ya’ni taqiqlash mumkin bo’lmaganlari (masalan, “nikoh to’yi”) sho’ro mafkurasiga mos tarzda o’zgartirila boshlandi.

O’zbeklarning azal-azaldan to’ylari ko’p bo’lgan. To’ylar – orzu-umidlar ushalishi ayyomi sifatida hozir ham davom etmoqda. XXI asrning so’nggi 10 yilligi boshida o’zbek to’ylari qatoriga yana bir shodiyona – respublikamizning mustaqillik bayrami kuni qo’shildi. 1991 yildan boshlab 1 sentabr kuni eng aziz, eng ulug’ milliy bayram kuni bo’lib qoladi. 1 sentabr mustaqillik kuni sifatida mamlakatimiz miqyosida har yili katta shodiyona bilan nishonlanmoqda.

Mustaqillik o’zbek xalqiga o’z qadr-qimmatini, dinu e’tiqodini, tili va ma’naviyatini qayta tiklab olishga, milliy g’urur va Vatanga muhabbat tuyg’ularini kamol toptirishga to’la-to’kis asos yaratdi. Mustaqillik bayrami o’zbek xalqining eng muhim an’anasiga aylanmoqda.

Dunyoning barcha xalqlari mustaqillik kunini o’zlarining eng asosiy bayrami deb hisoblashadi. Masalan, AQSh, Finlandiya, Gretsiya, Bangladesh, Senegal, Isroil, Xorvatiya, Filipin, Vyetnam, Kipr kabi juda ko’plab mamlakatlarda mustaqillik kuni davlatning eng asosiy bayrami sanaladi.

Ba’zi davlatlarda respublika mustaqilligi bilan bog’liq bir necha sana nishonlanadi. Masalan, Qozog’istonda 25 oktabr – Respublika kuni, 16 dekabr – mustaqillik kuni sifatida bayram qilinadi. Janubiy Afrika Respublikasi, Makedoniya kabi davlatlarda milliy bayram respublika kuni deb ataladi. Turkmaniston esa 12 dekabr Neytralitet kuni degan nom ostida mustaqillik bayramini nishonlaydi. Qirg’iziston 31 avgusta, Tojikiston esa 9 sentabrda mustaqillik kunini bayram qiladi. 2001 yilda Ukraina, Gruziya respublikalari ham o’z mustaqilligining o’n yilligini nishonladilar. Ozarbayjonda 28 may Ozarbayjon respublikasi tiklanish kuni (1918 yil) sifatida bayram qilinsa, 18 oktabr, Mustaqillik kuni hisoblanadi. Armanistonda 28 may Mustaqillik kuni, 21 sentabrda Armaniston Respublikasi Mustaqilligi to’g’risida referendum yilligi nishonlanadi. Belarus Respublikasi 3 iyulni Mustaqillik kuni deb belgilagan bo’lsa, shunday bayram Moldovada 27 avgustda o’tkaziladi.

Ko’pgina mamlakatlarning mustaqillik bayramlari o’ziga xos nomlar bilan ataladi.

Avstraliyada Avstraliya kuni, Yangi Zelandiyada Vaytang kuni, Bolgariyada Usmon imperiysidan ozod bo’lgan kun, Marokashda Taxt kuni, Suriya Arab Respublikasida Evakuatsiya kuni, Argentinada May inqilobi yilligi, Fransiyada Bastiliya olingan kun, Singapur respublikasida milliy kun, Germaniyada Germaniya birligi kuni (1990 yil), Avstraliyada milliy bayram deb ataladi. Albatta, bu kunlar mazkur mamlakatlarning tarixi bilan bog’liq.

1991 yil 1 sentabrda ilk bor mustaqillik bayrami O’zbekistonda nishonlandi.

Bu bayramning nishonlanishi haqida “Xalq so’zi” gazetasi quyidagilarni yozgan edi: “Ko’p millionli O’zbekiston xalqi jumhuriyat Oliy Kengashning sessiyasida ta’sis etilgan yangi bayram – Mustaqillik kunini birinchi marta nishonladi. Jumhuriyat parlamenti qabul qilgan Qonunga muvofiq O’zbekiston mustaqil respublika bo’lib qoldi, bayramning belgilanishi ana shu shonli voqea bilan uyg’unlashib ketdi. Endi 1 sentabr bayram sifatida nishonlanadi va dam olish kuni deb hisoblanadi. Shu kuni O’zbekiston poytaxtining bosh maydonida tantanalar uyushtirildi. Bu yerda odatdagi dam olish kunlaridek odamlar sayr qilib yurishdi, ayni vaqtda musiqa sadolari, rang-barang bayroqlar bu kunning tantanavorligini bildirib turdi. Kechqurun esa badiiy havaskorlik jamoalari shaharliklarga o’z mahoratlarini namoyish etishdi. Shaharning boshqa maydonlarida, oromgohlari, hiyobonlari va bog’larida ham artistlar, ijodiy guruhlarning chiqishlari bo’ldi. Xalq sayillari o’tkazildi.

Xalqlar do’stligi ordentli Toshkent dorilfunining markaziy maydonida miting bo’ldi. So’zga chiqqan kishilar to’planganlarni Mustaqillik kuni bilan tabrikladilar, eng ezgu tilaklarini izhor qildilar. Mustaqillik kuni O’zbekistonning barcha viloyatlarida keng nishonlandi”.

Endi esa istiqlol yillari bu bayram qanday nishonlanib kelinayotganligiga bir-bir to’xtalib o’taylik.

1992 yil. Mustaqilligimizning bir yillik bayrami xalqimiz xotirasida yaxshi kunlardan biri sifatida saqlanib qoldi. Toshkent Mustaqillik maydoni. Maydon uzra turfa bayroqlar shamol epkinida silkindi. Eng balandda esa respublikamiz bayrog’i hilpirab, har bir yurakka shukuh baxsh etadi. O’zbekistonning milliy ramzlari tushirilgan ulkan sharlar havoda muallaq qotgan. Maydondagi bosh sahna bir lahzadan so’ng tomoshalar boshlanishidan darak berib turibdi. Maydonning eng to’rida, baland shohsupada ulkan yer shari. Unda O’zbekiston hududi ramzi yarqirab ko’rinadi. Qaraysanu, mushtdek yuragingga ummondek sevinch, faxr, g’urur jo bo’ladi. Minglab hamshaharlarimiz bu yerga erkimizning bir yoshini bayram qilish uchun yig’ilgan. Maydonning ikki tomonida o’rnatilgan “O’zbekiston: Mustaqillik, Tinchlik, Hamkorlik” degan shior bilan bezatilgan havo sharlari ko’kka o’rladi. Karnay-surnay va nog’oralar sadosi to’y boshlanishidan xabar berib, atrofga taraldi. Havoni o’nlab karnay-surnay, nog’orayu-surnaylarning sadolari titratib yubordi.

“Ey muazzam, ozod yurt, istiqloling muborak!
Olamga ko’z-ko’z etarlik baxtu iqboling muborak!”…

deb boshlangan she’rlar yangraydi.

Bosh sahnaga onalarimiz chiqib kelishadi. Ular go’yo buyuk Zebiniso, Nodira, Uvaysiy, To’marislar qiyofasida xuddi asrlar qa’ridan chiqib kelishayotgandek. Ulardan so’ng namoyon bo’lgan hazrat Navoiy va Bobur o’z lutflari ila barchaning dilini sarafroz etadi.

Bayram tomoshalarida xalqimiz tarixini, buguni va kelajagini yoritishga alohida o’rin beriladi. Darhaqiqat, Mustaqil davlat tuzish asrlar davomida xalqimiz farzandlarining tinimsiz olib borgan mashaqqatli kurashlari natijasi bo’ldi. Maydon bo’ylab o’tgan “Buyuk ipak yo’li” karvonlari bizning hayolimizni istiqlol tomon olib ketdi. Bu tarixiy yo’llarda ajdodlarimiz bosqichlarga qarshi kurashdilar, erk uchun jon fido qildilar. To’maris, Shiroq, Spitamenning yovlarga qarshi kurashlari, Alpomishning ikkiga bo’lingan urug’ini birlashtirish uchun qilgan qahramonlik harakatlari, Amir Temur va Boburning ulug’ davlatchilik borasidagi ishlari bunga misol bo’la oladi. Istiqlol sari odamlab kelayotgan Mullo Solihbek, Azizbeklar. Ular Munavvar Qori, Abdulla Qodiriy, Cho’lpon, Fitrat, Usmon Nosirlar. Ajdodlar jabhalardan, janggohlardan to’g’ri huzurimizga kirib kelayotgandek. Ha, ular to’kkan qon evaziga istiqlolimiz shafaqlari nurlandi.

Istiqlol, Tinchlik, Totuvlik – eng avvalo bolalar uchun! Teatrlashtirilgan ommaviy tomoshalarni sho’x va quvnoq kuylar ostida yurtimizning kelajagi bo’lgn kichkintoylar raqs va qo’shiqlar bilan boshlab berdilar. Maydon uzra sho’x qo’shiqlar sadolandi. Sahnada yuzlab bolajonlar xuddi lolalardek sochilib ketishdi, ularning baxtiyor chehralari har qanday bayramga chiroy bag’ishlaydi, albatta.

Maydonga jahon va olimpiada o’yinlarida O’zbekiston sharafini himoya qilib, sovrindor bo’lgan o’nlab sportchilar kirib keldilar. Sport – tinchlik, farovonlik belgisi. Agar tinchlik bo’lmasa, sport musobaqasi yurakka sig’armidi? Bu namoyish insonning ko’nglida ana shunday hisni paydo qiladi. Beixtiyor o’z yurtingdan yetishib chiqqan chempionlarni ko’rib g’ururlanasan, kishi.

Shundan so’ng maydonni yaqindagina tashkil etilgan milliy gvardiyachilar vakillari egallab, o’z harbiy mahoratlarini ko’rsatdilar.

Badiiy jamoa a’zolari o’z dasturlarini namoyish qildilar.

Bayram tantanalri respublikamizning barcha shaharlarida erta boshlanib, oqshomgacha davom etdi.

Toshkent shahrining deyarli hamma yerida ommaviy xalq sayillari bo’lib o’tdi. Maydonlarda, ko’chalarda, xiyobon va istirohat bog’larida xushchaqchaqlik hukm surdi. Toshkent viloyatida ham bu bayram o’zgacha shukuh bilan nishonlandi.

2001 yil – mustaqillikning 10 yilligi arafasida yurtdoshlarimizga: “Bu bayramni ilk bor nishonlaganligini qanday eslaysiz? – degan savolga ular quyidagi javoblarni berishdi:

Egamqul Tohirov (Toshkent viloyati, Oqqo’rg’on tumani): – 1992 yilda O’zbekiston mustaqilligining bir yilligi bayram qilinganda, avvaliga ajablandim. Har holda “bu ellik yoki oltmish yillik asna emas-ku, bir yilligi ham shunchalik bo’ladimi?” – degan fikr hayolimdan o’tdi. Keyin ko’zimizni kattaroq ochib qarasak, dunyoda mustaqillik bayramidan ko’ra buyuk shodiyona yo’q ekan. Ishonchim komilki, istiqlolni mustahkamlashda har yili orziqib kutadigan eng ulug’, eng aziz bayramizning o’rni alohida bo’ladi.

Nosir Sattorov (Sayxunobod tumani): – O’z mamlakating, o’zing mansub bo’lgan millatdan g’ururlanish kerakligini bizga shu bayramlar o’rgatdi. Bunda mamlakatimiz Prezidenti Islom Karimovning tarixiy xizmatlari beqiyosdir. Mana, bu yil o’ninchi bor bayram qilamiz.

Toshboy Omonov (Denov tumani): – Uni ko’pchilik eslay olsa kerak. Chunki bayram oqshomi ham shakl, ham mazmun jihatidan yangicha tartibda o’tgandi. Bayramlarimiz ilgari bunday o’tkazilmagani uchunmi, uni ilk bor televizordan ajib bir hayrat bilan tomosha qilganman.

Abdulhamid Abdug’aniyev (Xo’jaobod tumani): – Ha, biz ilk bor xalqimiz quvonchining ifodasi bir maydonga jam bo’lganidan shodlandik. 1992 yilda o’tkazilgan tantana ma’naviy hayotimizdagi tub burilishga sarchashma bo’lgandi.

Qarshi shahrida mustaqillik kuni arafasida “Do’stlik sayli” bo’lib o’tdi. Unda shu vohada yashab, mehnat qilayotgan barcha millat va elat vakillari ishtirok etdi. Har bir millatning shoiru oqinlari chiqishlari uyushtirildi. Badiiy buyumlar, o’ymakorlik san’ati, kulolchilik bo’yicha ko’rgazmalar ochildi. San’atkorlar, yosh ijrochilarning chiqishlari raqs bayramiga fayz kiritdi.

Savdo xodimlari “do’stlik sayli” tantanalariga alohida ruh kiritdidilar. Xiyobon va ko’chalarda, istirohat bog’larida savdo uyushtirildi, oshxonalar tashkil etildi.

Namanganda 50 mingan ortiq kishi markaziy o’yingohga kelib, erk va ozodlik ne’mati naqadar totli ekanligini yanada chuqurroq his etdilar. Bu yerda san’at va sport bayrami tantanasi g’oyat ko’ngilli o’tdi.

Farg’ona aholisi Mustaqillik tongini karnay-surnat sadolari ostida qarshi oldi. Mahalla-ko’y, ko’cha va hiyobonlarda kishilar bir-birlarini bayram bilan qutlab, tantana sharafiga tuzilgan dasturxon atrofiga yig’ildilar. Viloyatning barcha shahar va qishloqlarida istiqlol sharafig elga nahorga osh tortildi.

Farg’ona shahri yaqin yillar ichida bunday tantana, anjumanni ko’rmagan desak, mubolag’a bo’lmaydi. Ertalabdanoq ko’cha va xiyobonlar, maydon va bog’lar odamlar bilan to’ldi. Ahmad Farg’oniy nomi berilgan madaniyat va istirohat bog’i tantanalarning markazi bo’ldi. Bu yerda Ahmad Farg’oniy sharafiga o’rnatilgan byust tantanali ravishda ochildi.

Qo’qon ham istiqlol bayramidan go’yo yosharib ketganday. Shahar manzalarida ko’hna o’mish bilan erkinlikka yosh bugungi kun porloq bir tarzda uyg’unlashib ketgan edi.

Marg’ilonda esa Mustaqillik bayrami gullar va qushlar bayrami bilan uyg’unlashib ketdi. Shaharning 4 ta dahasida alohida-alohida teatrlashtirilgan bayram tantanlari bo’lib o’tdi. Kechqurun esa “Spartak” stadionida viloyat san’atkorlari, badiiy havaskorlar, sportchilar, harbiy qismlarning xizmatchilari 3 soat davomida teatrlashtirilgan tomoshalarini namoyish etdilar.

Surxondaryoda ham Mustaqillik bayrami kuni Termiz haqiqiy ma’nnoda mamlakat darvozasiga aylandi. Bayramda chet el firmalari bilan bevosita hamkorlikda ishlayotgan o’nlab qo’shma korxonalar o’z faoliyatini natijalarini ko’rsatishdi.

Shu kuni istiqlol sharafiga tashkil etilgan savdo rastalarida chorvachilik va qishloq xo’jalik mahsulotlari bozordagidan ancha arzon narxlarda sotildi. Badiiy havaskorlik jamoalari ertadan kechgacha tomosha ko’rsatdilar. Sovrinlarning eng zo’ri abjir chavandozlarga va kuchli polvonlarga nasib etdi.

Viloyatlarda bayram arafasidagi eng katta yangilik shu bo’ldiki, Termiz shahrining qoq o’rtaidagi maydonda Termiziy haykali qad tikladi, haqiqat qaror topdi.

Samarqand uzra erta tongdanoq karnay-surnay ovozlari keng taraldi. Mustaqillik kuniga bag’ishlangan tantanalar erta tongdanoq kechgacha davom etdi. Bayram arafasida bir qancha korxonalar, katta zavod va fabrikalar filiallari, yangi maktab binolari va boshqa ob’yektlar ishga tushirildi. Viloyat va shahar hokimligi rahbarlari, jamoat tashkilotlari vakillari ana shu kun arafasida korxonalarda, qariyalar va bolalar uylarida bo’lishib, sovg’a-salomlar topshirdilar.

Buxoro shahridagi “Buxoro” mehmonxonasi tomlarida chalingan karnay-surnay sadolari hammani mustaqillikka bag’ishlangan sayillar boshlanganidan ogoh qildi.

Shaharning bosh maydoni – Mustaqillik shohko’chasida tojik, turk, qrimtatar, rus, koreys va yahudiy milliy-madaniy markazlari o’z xalqining betakror san’ati, urf-odati, shuningdek milliy taomlarini namoyish etdi.

Registon maydoni, Labihovuz yon-atrofi, Ark hovlisi, istirohat bog’larida havaskor va folklor dastalarining chiqishlari, Sadriddin Ayniy nomidagi viloyat musiqali drama va komediya teatri, viloyat filarmoniyasi artistlari tomoshalari barchani o’ziga rom etdi. Shahardagi o’yingohda bayram tomoshalari uzoq davom etdi.

Xorazm diyorida bayram tantanalari hamma yerdagidan ham barvaqt boshlandi. Mehnat jamoalari va qishloqlarida elga osh berildi, yordamga muhtojlarga sovg’a-salomlar ulashildi, ilg’orlar rag’batlantirildi, kuy-qo’shiqlar avj oldi. Urganchning markaziy maydonida 13 katta dasturni o’z ichiga olgan bayram tomoshalari namoyish etildi. Shuningdek, shaharning muborak qadamjolari: al Xorazmiy va Avaz O’tar haykali oldidagi xiyobonlarda, azim Shovot kanali sohilidagi sayilgohda, madaniyat va istirohat bog’ida, “Olimpiya” sport sog’lomlashtirish kompleksida ham tantanalar davom etdi. Tantanalar munosabati bilan turli daha va maydonlarda qishloq xo’jalik noz-ne’matlari savdo ko’rgazmasi, rang-barang xalq iste’moli buyumlari savdosi uyushtirildi.

O’zbekiston mustaqilligining bir yilligiga bag’ishlangan tantana Moskvada Bolshaya Polyankada ish boshlagan respublikamiz elchixonasida ham bo’lib o’tdi. Bu yerga respublikamiz vakillarini mustaqillik bayrami bilan qutlash uchun xorijiy mamlakatlarning elchilari tashrif buyurdilar. Ular sharafiga nonushta-ziyofat uyushtirildi.

Mustaqillikning bir yillik bayrami xalqimizning asrlar bo’yi orziqib kutgan tinchlik, hamkorlik va erk bayrami bo’lib, tarixga kirdi.

1993 yil. Bu yilgi tantanalar “Mustaqillik, Tinchlik, Hamkorlik” shiori ostida o’tdi. Bu shior bayramga teran mazmun, xalqning eng yuksak madaniy qadriyatlari, uning eng yaxshi an’analari va urf-odatlari, vatanparvarlik va milliy g’ururning tiklanish ruhini baxsh etdi.

Toshkentning Mustaqillik maydoni g’oyat ulug’vor va chiroyli tus olgan, rang-barang alvon bayroqlar, xilma-xil tusdagi chiroq nurlari bilan qorishib, bayramona kayfiyat uyg’otadi. Tantanali bayram barcha qalblarga olam-olam sevinch, surur baxsh etdi.

Bosh maydon uzra O’zbekiston madhiyasi yangrab, asta-sekin davlat bayrog’i ko’tarildi. Shu hayajonli daqiqalarda tantanada ishtirok etayotgan har bir odam o’zining kelajagi buyuk davlat farzandi ekanligidan faxrlanadi!

Mustaqil O’zbekistonning tengdoshlari respublikamiz mustaqilligi e’lon qilingan kunda tug’ilgan bolalarga bag’ishlangan qo’shiq yangraydi. Istiqlol tengdoshi – farzandini bag’riga bosgan ona mag’rur qadamlar bilan sahnaga olib chiqib keldi. U respublikadagi barcha onalar nomidan o’z farzandlarining baxt-saodati uchun tashakkur va minnatdorchilik izhor etdi. Vatanimizning mustaqilligi bolalar tinchligi va osoyishtaligining, musaffo osmon ostida o’sib-ulg’ayib, o’qishi va mehnat qilishining garovidir.

Toshkentdagi bolalar bog’chalari va maktab badiiy jamoalari ijro etgan qo’shiq-raqs guldastasi respublika yoshligining ramzi bo’lib yangraydi. Maydon uzra bolalarning qo’ng’iroqdek ovozi jaranglaydi. Bayram dasturining bu qismi o’yin-kulgilar bilan o’tdi. Ot o’yini boshlandi, bolalar sevgan ertak qahramonlari jonlandi.

Katta tomoshaning navbatdagi qismi vatan himoyachilarining chiqishlakriga bag’ishlandi. Namoyishlar xiyoboni bo’ylab armiyamiz vakillari o’ta boshlaydi. Armiya safida xizmat qilayotgan askarlar esa yurish mashqlari va harbiy mahoratlarini namoyish etdilar. O’zbekiston Mudofaa vazirligi orkestri bayram marshini ijro etdi. So’ng harbiy qasamyod so’zlari mag’rur va tantanavor yangradi. Yosh askarlar Vatanga, xalqqa, Prezidentga sadoqatli bo’lishga qasam ichdilar.

Bayramning navbatdagi qismi “To’ylar muborak!” deb nomlanib, milliy to’y marosimlari katta teatr tomoshalariga uyg’unlashib ketdi. Kelin-kuyovlarning yuziga quvonch va baxt balqib turibdi. Mehmonlar ham ularga qo’shilib, raqsga tushib, bayram tantanalariga milliy joziba bag’ishladilar.

“Xalqimizning umumbashariy qadriyatlarga sodiqligi – mustaqil O’zbekiston kuch-qudratining manbaidir. Xalqimiz adolat, tenglik, yaxshi qo’shnichilik va insonparvarlikning nodir kurtaklarini asrlar osha avaylab, asrab keldi”, degan edi Respublika Prezidenti Islom Karimov. Bu so’zlar yorqin va chiroyli bayramning asosiy mavzusiga vobasta bo’ldi. “Besh qit’a” vokal-xoreografiya kompozitsiyasi “O’zbekiston darvozasi butun dunyo uchun ochiq” degan mavzuga bag’ishlangan. Unga Turkiya, Eron, Hindiston, Xitoy hamda boshqa mamlakatlar xalqlarining raqslri kiritilgan. Bu raqslarni Toshkent, Nukus va Samarqanddagi opera va balet teatrlari artistlari, xoreografiya bilim yurti o’quvchilari ijro etdilar.

O’tmishsiz kelajal bo’lmaydi, deydilar. Bayram dasturidan o’rin olgan adabiy-tarixiy chiqishlar siz bilan bizni bir zum o’tmishga ham qaytardi. Sharqning buyuk allomalari – Amir Temur, Bahouddin Naqshbandiy, Ulug’bek, Alisher Navoiy, Bobur va boshqa alloma, ma’rifatparvarlar maydonga chiqib kelishdi.

Maydonni yoritib turgan chiroqlar o’chdi. Sahnani mash’alalar yoritdi. Ularni dubulg’a kiygan “o’rta asr jangchilari” ko’tarib bormoqda. Moziy qahramonlari va mutafakkirlari bizga – o’z avlodlariga murojaat qilib, xalq asrlar mobaynida erishgan yutuqlarni avaylab-asrashga va rivojlantirishga da’vat etayotgandek bo’ldi.

Qoraqalpog’iston va respublika viloyatlarining vakillari ham tomoshabinlarni bayram bilan qutladilar. Ular o’ziga xos urf-odatlari, marosimlari va an’analarini namoyish etdilar. Artistlar san’ati, mahorati tomoshabinlarga bir necha daqiqada Samarqand va Buxoroning, Xorazm va Farg’ona vodiysining qadimiy madaniyatini yaqqol his etish imkonini berdi. “Mehrjon” dastasining dasturi bu go’zal tomoshaning mantiqiy intihosiga aylandi.

Markaziy Osiyodagi qardosh respublikalarning mashhur artistlari ishtirokidagi tomoshalar bayram tantanalariga o’zgacha tarovat baxsh etdi. Sahnaga Turkmaniston, Tojikiston, Qozog’iston va boshqa mamlakatlardan kelgan taniqli Estrada ijrochilari chiqib, o’z mahoratlarini, san’atlarini mezbonlarga va xorijlik mehmonlarga hadya etdilar. Ulkan bayram tomoshasida yetti mingdan ortiq artist va havaskor ishtirok etdi.

Mustaqillik bayrami shodiyonalariga Toshkentdagi barcha xorijiy hamda hamdo’stlik davlatlarining elchilari, vakolatxonalarning mas’ul xodimlari va jurnalistlari taklif etildi.

Bayram tantanali sayillar shahardagi barcha xiyobon, madaniyat va istirohat bog’lari, mahallalarda bo’lib o’tdi.

Shu kuni 4 yarim mingdan ortiq klub muassalari va 115 ta madaniyat va istirohat bog’larida ham turli-tuman tadbirlar o’tkazildi. Ularda xalqimiz e’tiborini qozonib kelayotgan eng yaxshi badiiy havaskorlik jamoalari, baxshi-shoirlar, badiiy so’z ustalari hamda 1993 yilda o’tkazilgan “Marhabo, talantlar”, “Anor”, “Raqs-93”, “Alla”, “Qiziqchi-93” ko’rik-tanlovlari g’oliblari ishtirok etishdi.

Bayram tantanalari Markaziy Osiyo va xorijiy davlatlar televideniyesi va radiosi orqali namoyish etildi, eshittirildi hamda shu asosda hujjatli filmlar yaratildi.

1994 yil. Mustaqillik maydoniga o’rnatilgan oltin tusli muazzam yer kurrasidagi O’zbekiston xaritasi va davlatimiz Gerbi xilma-xil chiroqlar nurida jozibali tovlanadi. Har yoqda bayroqlar va alvonlar hilpirab, dillarga shodiyona ruh bag’ishlaydi.

“Biz uchun mustaqillik – Ollohning o’zi el-yurtimizga in’om etgan tabiiy boyliklarga egalik qilish, xalqimiz qudrati, salohiyati, aqlu zakovatiga tayanib, O’zbekistonda yashayotgan har bir inson, har bir oila uchun munosib hayot qurish, kelajak avlodlar uchun ozod vatan qoldirishdir”, deb ta’kidladi respublikamiz Prezidenti I.Karimov bayramning ochilish marosimida so’zlagan tabrik nutqida.

Maydon uzra O’zbekiston madhiyasi yangraydi. Samoda davlatimiz bayrog’i hilpiraydi. Tantanada ishtirok etayotgan har bir odam buyuk davlat – O’zbekiston fuqarosi ekanidan cheksiz fahr hissini tuyadi.

Bayram chaqiriqlari sadosi yangragach, “Yayra, O’zbekiston” deb nomlangan yangi vokal-simfonik asar bilan bayramning “Muqaddima” qismi boshlandi.

Ulug’vor qo’shiqdan so’ng, maydonni aziz bolajonlarning quvnoq qiyqirig’i egalladi. “Sog’lom avlod uchun” deb nomlangan teatrlashtirilgan tomosha boshlandi. Sahnada yoshlarimiz o’qishi, mehnati, dam olishi sahnalari badiiy umumlashmalarda aks etib, o’zining samimiyligi va quvnoqligi bilan dillarni rom etdi. Kattalar qalbi beg’ubor yoshlik qarshisida to’lqinlanib ketdi.

Bayram dasturining keyingi qismi “Tarix sahifalari” deb nomlangan bo’lib, yaqin o’tmish yana bir bor yodga olindi. Ular orqali bugungi tinch, osuda mehnat chirog’i bilan yaratilgan kunlarimiz qadriga yetish, uni asrab-avaylash zararligi ifoda etildi.

Ushbu sahna etyudlarini O’zbekistonning barcha go’shalarini kelgan eng yetuk san’atkorlar, mashhur badiiy jamoalar namoyish etdilar.

“O’zbekiston – xalqlar do’stligi davrasi” deb atalgan tomoshalar turkumida mamlakatimizda hukm surayotgan tinchlik, osudalik, unda yashab turgan yuzdan ortiq millat vakillarining yagona maqsad yo’lida bir tan, bir jon bo’lib mehnat qilayotgani natijasi ekanligi ifoda etildi. Tomoshalarni milliy madaniy markazlarning eng yetuk havaskorlik jamoalari namoyish etdilar.

“O’zbekiston san’ati turfa rang” deb atalgan tomoshalar turkumida avvalgi tomoshada ilgari surilgan fikrlar yanada rivojlantirilib, aniqliklar kiritildi. Respublikamizning barcha viloyatlari va Qoraqalpog’istondan kelgan yosh avlod vakillari o’zlarining betakror san’atlari bilan ajdodlar udumiga sodiqliklarini, ulug’vor an’analarni davom ettirishga qodir ekanliklarini ko’rsatdilar.

“O’zbekiston estrada yulduzlari” sarlavhasi ostida namoyish etilgan tomoshalar turkumida yosh estrada san’atkorlarining mustaqillikni tarannum etuvchi, xalq ma’naviyatini yuksaltirishga yo’naltirilgan yangi qo’shiqlari ijro etildi. Shu bilan birga mumtoz qo’shiqlarimizning yangi ovozlar ijrosidagi talqinlari dillarga faxr-iftixor ulashdi. Bayram birinchi sentabr kuni ham davom etdi. Toshkentliklar va mehmonlar uchun doshqozonlarda palovlar damlanib, dasturxonlar yozildi. Xalq amaliy san’ati ko’rgazmasi, milliy sport o’yinlari musobaqalari uyushtirildi. “Shodlik”, “Zarafshon”, “Lazgi”, shuningdek, uyg’ur xalq ansambli kabi mashhur san’at jamoalari, dunyoga mashhur xonanda va raqqosalar kechga qadar xalq xizmatida bo’ldilar. Anhor bo’yi xiyoboni, Xalqlar do’stligi maydoni, O’zbekiston milliy bog’i, Alisher Navoiy yodgorligi maydoni, Xadra maydoni, Alisher Navoiy teatri maydoni, Amir Temur xiyoboni va Sayilgoh ko’chasi, “Turkiston” saroyining yozgi binosi bayram qatnashchilarining sayri, o’yin-kulgisi, savdo rastalaridagi to’kin-sochinlik mustaqillikning uch yillik bayrami shukuhiga shukuh qo’shdi.

Ma’lumki, 1994 yil YuNESKO tomonidan Oila yili, deb e’lon qilingan. Azaldan bolajon o’zbek xonadonida o’sayotgan farzandlar ro’shnolik, mehr, izzat ko’rib voyaga yetmoqda. Shu o’rinda, Prezidentimizning “Kam ta’minlangan oilalarni ijtimoiy himoyalashni kuchaytirishga oid chora-tadbirlari to’g’risida”gi bayram arafasida chiqqan Farmonini esga olish kifoyadir. Bayram dasturida ushbu muqaddas mavzuni targ’ib va tashviq qilishga doir chiqishlar namoyish etildi. Kechada ko’p millatli yurtimizning turli tildagi kuy va qo’shiqlari yangradi, raqslar namoyish etildi.

O’zbek diyoridan uchar sadolar,
Ularni jahonga yoyar sabolar.

Katta sahnaga viloyatlar san’at namoyandalari kirib keldi. Kuy qo’shiqqa ulandi.

Yurtimizning taniqli estrada yulduzlari ishtirokidagi tomoshalar bayram tantanalariga o’zgacha tarovat bag’ishladi. Sahnaga O’zbekiston, Markaziy Osiyo davlatlarida, hatto, jahonga dong’i ketgan mashhur o’zbek estrada ijrochilari chiqdilar. Bayram ahli “Yalla” guruhi, Yulduz Usmonova, Nasiba Abdullayeva, Kumush Razzoqova va boshqalarning mahoratini, san’atini olqishlashdi.

“Har bir odam bayramda ishtirok etar ekan, uning yuragini shunday buyuk yurtning farzandiman, mamlakatning vatanparvariman, shu aziz va mo’tabar vatan uchun jonimni ham fido qilishga tayyorman, degan tuyg’u qamrab olishi kerak. Toki bizga uncha xayrixoh bo’lmaganlar ham bayramni ko’rib, O’zbekiston kelajagi buyuk davlat ekanini his etsin”, – degan edi mamlakatimiz rahbari. Mustaqillik bayrami respublika televideniyesi tomonidan keng yoritildi. Matbuot sahifalarida qutlug’ sana taassurotlari mangulikka muhrlandi.

1995 yil. Toshkent. Mustaqillik maydoni. Mamlakatimiz Prezidenti Islom Karimov bayram qatnashchilariga va butun o’zbek xalqiga qarata tabrik nutqi so’zladi. Maydon uzra O’zbekiston madhiyasi yangradi. Davlatimiz bayrog’i ko’tarildi.

Biz mustaqillik tufayli buyuk ajdodlarimiz qoldirib ketgan bebaho ilm-fan, ma’naviyat va ma’rifat xazinalaridan bemalol foydalanish imkoniyatlariga ega bo’ldik. Ismoil al-Buxoriy, At-Termiziy, Bahouddin Naqshbandiy, Ulug’bek, Alisher Navoiy, Zahiriddin Muhammad Bobur, Boborahim Mashrab, Nodirabegim va boshqa buyuk allomalar tavalludlari o’tkazildi. 1993 yili Prezidentimiz Farmoni bilan jahongir Amir Temur xiyoboni bunyod etilib, sohibqironga mahobatli yodgorlik o’rnatildi. Mustaqillik bayramida bu voqealar o’ziga xos sarhisob sifatida ko’rsatib berildi.

Sahnaga xalqaro musobaqalarda g’olib chiqqan yurtimiz sportchilari va yosh fizkulturachilar egalladi.

O’zbekistonning BMT va boshqa turli xalqaro tashkilotlar bilan hamkorligi tobora mustahkamlanmoqda. Xuddi shu yil iyul oyidan boshlab, mamlakatimiz poytaxtida Yevropada Xavfsizlik va tashkilotining mintaqaviy byurosi faoliyat yurita boshladi.

O’zbekistonning jahon bilan do’stona munosabatlariga bag’ishlangan badiiy lavhada besh qit’a xalqlarining san’ati namoyish etildi. O’z navbatida, xorijiy kuy va raqslar milliy qo’shiqlar bilan birin-ketin ijro etildi. Tomoshabinlar hofizu raqqosalarning san’atini qizg’in olqishladi.

Sahnaga oftob rangli koptokchalar va shamsiyalar ko’targan shirin-shakar kichkintoylar chiqib, sho’x kuy-qo’shiqlar ijro etishdi.

Tomoshagohlar uzra maqom navolari taraldi. Mumtoz musiqa va g’azalning uyg’un ohangi hayolingizni olis moziylarga yetakladi… Shu yilning o’zida o’ndan ortiq yosh sozanda Fransiya, Angliya, AQSh, Germaniya singari davlatlarda o’tkazilgan nufuzli tanlovlarda ishtirok etdi va ularning ko’pchiligi sovrinli o’rinlarni egallashga muvaffaq bo’ldi. Shulardan biri – ijrochilik mahorati bilan jahon musiqa shinavandalarini maftun yosh skripkachi, Buyuk Britaniya da o’tgan xalqaro tanlov g’olibi Daniil Xoliqov mustaqillik bayrami arafasida Prezident stipendiyasiga munosib deb topildi. Bosh maydondagi bayram kechasida D.Xoliqov va yurtimizning boshqa taniqli san’at ustalari jahon mumtoz kuylari va raqslaridan namuna ijro etdi.

Qo’rg’onimiz bitta ona-Turkistondir,
Bo’stonimiz bitta ona-Turkistondir.

Navbatdagi badiiy lavha Markaziy Osiyo mamlakatlari – O’zbekiston, Qozog’iston, Qirg’iziston, Tojikiston, Turkmaniston davlatlarining do’stligiga bag’ishlandi. Turkiston xalqlarining kuy va raqslari ruhni to’lqinlantirdi. Qardosh tillarda ijro etilgan qo’shiqlar esa qadim Turon elatlari do’stligi va birodarligini tarannum etdi…

Bayram dasturining muqaddima qismida opera va balet teatri solistlari, birlashgan xor va milliy orkestr “Vatan yagonadir” deb atalgan yangi qo’shiqlarni ijro etdi.

“Istiqlol to’ying muborak, O’zbekiston!” nomli vokal-xoreografik syuitada mashhur hofizlar o’z san’atlarini namoyish etdilar.

“Bahor”, “Lazgi”, “Shodlik”, “Zarafshon”, “Tanovar” ansambllari, Muqimiy teatri, “Chun-Chun” koreys jamoasi, Uyg’ur ashula va raqs ansamblidan iborat to’rt yuzga yaqin san’at ustalari istiqbol to’yining fayzli va mazmundor o’tishiga o’z hissasini qo’shdilar.

Viloyatlar va Qoraqalpog’iston Respublikasidan poytaxtga tashrif buyurgan san’atkorlar, havaskorlik jamoalari o’z vohayu vodiysining turfa xil kuy-qo’shiqlarini olib kelib, bayramni gullatdilar. Ularning chiqishlari televideniye orqali o’z hududlariga ham havola etildi.

O’zbekistonlik san’atkorlar faqat milliy kuy-qo’shiqlarnigina emas, balki jahon klassik san’ati namunalarini ham mahorat bilan ijro etishga qodir ekanliklarini bayram dasturi orqali namoyish etdilar. Bu “Jahon klassikasi – o’zbek san’atkorlari ijrosida” deb nomlangan lavhalarda o’z ifodasini topdi.

“Turkiston umumiy uyimiz” deb nomlangan turkum tomoshalarida Markaziy Osiyoning barcha respublikalari kuy-qo’shiqlaridan namunalar ijro etildi. “O’zbekiston olamga ochiq” musiqali lavhasida xalqaro do’stlik, hamkorlik mavzusini tarannum etuvchi besh qit’a xalqlari san’atidan tuzilgan ajib guldasta tomoshabinlarga taqdim etildi.

“O’zbekiston estrada yulduzlari” nomli dasturda esa estrada san’ati namoyandalarining bayram uchun maxsus tayyorlab kelgan qo’shiqlari ijro etildi. Birinchi sentabr kuni Respublikamiz poytaxti, viloyat va tuman markazlarida bayram stollari tashkil etildi. Aholiga savdo-sotiq uyushtirildi. Yoz ne’matlari bozorlar va jamoat joylariga fayz baxshida etdi.

1996 yil. Shu yili Mustaqilligimizning 5 yilligi nishonlandi. Yillar ko’z ochib yumguncha o’tib ketadi. Mana, bayram dasturining taklifnomasida (1991-1996) Mustaqilligimiz 5 yilligi mohiyati qisqa va lo’nda satrlarda bayon etilganki, undagi so’zlarda ham bayram shukuhi ochiq ko’zga tashlanib turadi. Unda yoziladi:

“Istiqlol! Oltin kuzning boshlanish kuni bizga erk, baxt, xurlik quchog’ini ochdi. Istiqlol shukuhi va o’zligimizni insoniy g’urur bilan angladik, o’zgalarga ham yordam qo’lini cho’zdik. Irodamiz aqlimizni peshladi. Ruhiyatimiz poklandi, e’tiqodimiz mustahkamlandi. Ma’naviyatimiz buloqlari jo’sh urdi, qaynadi. Tafakkurimizda izlanish, idrokimizda bunyodkorlik ruhi ustivor bo’ldi. Baxtlar vodiysida erk, hurriyat, mehnat nashidalari yangradi”.

Jur’at va jasorat davrimiz ehtiyojiga, ishbilarmonlik, izlanish, fidoyilik asosiy fazilatimizga, elim, yurtim deb yonib yashash zamondoshlarimizning asosiy shioriga aylandi.

Istiqlolning qo’sh qanoti bor. Biri – moddiy, ikkinchisi ma’naviy. Iqtisod va ma’naviyatning uyg’unligi yurtga tinchlik, osoyishtalik va bunyodkorlik ruhini olib kirdi. Dunyo qalqib turgan qaltis bir zamonda biz boshqalarga namuna bo’ladigan yangi tarix yarata oldik. Jahon bizni tanidi. O’zbekiston jahon iqtisodiy hamjamiatining uzviy tarkibiy qismiga aylandi. Irmoqlar qo’shilib daryoga aylanganidek, bu yurt birin0ketin olamni hayratga solmoqda. Qisqa fursatda qo’lga kiritilgan yutuqlarimizni ko’rgan-bilganlar bizlarga havas ko’zi bilan qaray boshlashdi.

Besh yillik ishlarni qilsak sarhisob,
Qalbimiz g’ururga to’lar behisob.

Bayram onlari barchamizning erkimiz, xohish-irodamiz, maqsad va maslagimiz bir ekanligi yana bir karra namoyon bo’ladi. Vatan, istiqlol, do’stlik va hamjihatlik, bunyodkorlikni tarannum etuvchi qo’shiqlarni tinglaganda butun vujudimiz hayotga muhabbat hissi bilan limmo-lim to’ldi.

Bayram dasturining muqaddimasida “Jonim-O’zbekiston” qo’shig’i ijro etildi. San’atning ajib mehrigiyosi dillarga jon bag’ishladi.

Davraga navbatdagi “Istiqlol farzandlari” deb nomlangan bolajonlar guruhi chiqdi. Zero, xalqimiz – bolajon, o’zi yemay, bolasiga yediradi, bolasining quvongani  uning quvongani. Ushbu g’oya bolalar ijro etgan rang-barang qo’shiqlarda, badiiy lavhalarda, raqslarda va bayramona hayqiriqlarda o’z ifodasini topdi. Dasturning “O’zbekiston – yagona, ahil va oila” namoyishida xalqlar do’stligi, o’zbekning mehmondo’st va bag’rikengligi ifoda etilgan, teatrlashtirilgan tomoshalarida o’z ifodasini topdi.

“Turkiston – umumiy uyimiz” shiori ostida tuzilgan qo’shiqlar guldastasida Markaziy Osiyo xalqlarining kuy-qo’shiqlari yangrab, ota-bobolarining birodarlik an’analari bugun ham davom etayotgani tarannum etildi.

“Sport – yoshlik, mardlik maktabi” deb nomlangan faslda mamlakat tayanchi, faxri va g’ururi, kelajagi bo’lgan yoshlarga e’tibor qanday ulug’vor ishlarda o’z ifodasini namoyon etayotgani ko’rsatildi. Besh yil davomida qilingan bu boradagi ishlar faxr bilan sanab o’tildi. Sport ustalari nomi tilga olinib, ular bayram bilan qutlandi.

“Vatan posbonlari – tinchlik tayanchi” fasli O’zbekiston askarlari hayotiga bag’ishlandi. Qurolli kuchlarimizning tinchlik posboni bo’lib xizmat qilayotgani ramziy lavhalarda namoyish etildi.

“O’zbekiston – Vatanim manim” deb nomlangan faslda respublikamiz viloyatlaridan taklif etilgan san’atkorlar, mehnat va ishlab chiqarish ilg’orlari turli teatrlashtirilgan tomoshalarda ishtirok etib, har bir viloyatning o’ziga xos tomonlarini ochib berdi.

“Kuch – adolatdadir” deb nomlangan faslda teatrlashtirilgan adabiy-badiiy kompozitsiya namoyish etildi. O’tmish saboqlaridan to’g’ri xulosa chiqarish kelajak uchun buyuk yo’l-yo’riq ekanligi, o’zbek xalqining baxt-saodati adolatda ekanligi tarannum etildi.

O’zbekiston mustaqillik tufayli jahon hamjamiyatiga kirdi. Uning iqtisodiyot va ma’naviyat sohasidagi yutuqlari chet el ommasi nazariga tushdi, do’stlik rishtalari bog’landi. “O’zbekiston jahon maydonida” (Buyuk ipak yo’lining tiklanishi) deb nom olgan faslda ushbu g’oya adabiy-tarixiy lavhalar orqali namoyish etildi.

“Estrada yulduzlari porlaydi” faslida O’zbekiston ommaviy estraad san’ati  yorqin yulduzlariga navbat berildi. Mashhur estrada qo’shiqchilari, raqqosalar, xoreografik guruhlar do’stlik, baxt va muhabbat nashidasini kuyladilar.

Tomoshalarda respublikamizning yetakchi teatrlari, barcha viloyatlardan kelgan san’atkorlar, san’at sohasi bilan bog’liq barcha oliy o’quv yurti talabalri, Toshkent shahar o’quv yurtlarining talabalari, o’quvchilari, mudofaa vazirligiga qarashli badiiy jamoalar ishtirok etdi. Ularning mehnati tufayli mustaqillik bayrami butun xalqimiz ruhiyatiga olam-olam quvonch bag’sihladi.

O’sha hayajonli damlarni “Xalq so’zi” gazetasi shunday satrlar bilan tarix sahifasiga muhrlab qo’ydi:

“O’zbekiston Davlat madhiyasi” yangradi va bayram tantanalari boshlandi.

Maydonga yuzlarida baxt nuri balqib turgan bolalar kirib keldi…

Mustaqillik sharofati bilan biz ne-ne buyuk zotlarning vorislari ekanimizni angladik. Vatanimiz, uning bitmas-tuganmas boyliklari o’zimizniki bo’ldi. Bu esa yuragimizdagi vatanga muhabbat tuyg’ularini yanada oshirdi. Hadisi sharifda aytilgan “Vatanni sevmoq iymondandur” degan so’zlarning asl ma’nosini anglab yetdik.

Maydonda buyuk qadriyatlarimizni, vatanimizni ulug’lovchi qo’shiqlar taraladi.

Ko’plab jahon miqyosidagi musobaqalarda O’zbekiston vakillari yurtimiz sharafini munosib himoya qilib, vatanimiz dovrug’ini dunyoga taratdi. Futbolchilarimizning XXII Osiyo o’yinlaridagi muvaffaqiyati, Lina Cheryazova, Artur Grigoryan kabi yurtimiz vakillarining olamshumul yutuqlari shula jumlasidandir. Ularning g’alabasi sharafiga yurtimiz bayrog’i ko’tarilgani, davlatimiz madhiyasi yangrgani har bir vatandoshimizning ko’ksini tog’ qildi.

Shu yil Amerikaning Atlanta shahrida o’tkazilgan Olimpiya o’yinlarida O’zbekiston vakillari ilk bor mustaqil jamoa sifatida ishtirok etdi. Kurashchi A.Bogdasarov, bokschi K.To’laganov kabi vatandoshlarimiz ilk Olimpiada  medalariga sazovor bo’ldilar.

Maydonga olimpiadachilarimiz kirib kelishdi. Bayram qatnashchilari ularni qizg’in olqishladi. Shuningdek, maydonga milliy armiyamiz askarlari – mavjud qo’shin turlarining vakillari  kirib keldi. Ular shahdam odimlari, mohirona harakatlari bilan mustaqilligimiz posbonlari ekanliklarini namoyish etdilar.

Bayramda respublikamiz viloyatlaridan kelgan san’atkorlar o’z mahoratlarini namoyish etdilar.

1997 yil – “Inson manfaatlari yili” deb e’lon qilingani sababli, bu shior bayramning bosh mavzusiga asos bo’ldi.

Prezident Islom Karimov tabrik nutqi so’zladi. Marosim qatnashchilarini, ular siymosida butun O’zbekiston xalqini muborak bayram bilan qutladi.

Sahnaga kelajagimiz sohiblari – sho’x-shodon bolalar kirib keldilar. Ular ijro etgan qo’shiq va raqslarda quvnoq bolalik tarannum etildi. Mustaqillik yillarida tashkil topgan “Sog’lom avlod uchun”, “Ulug’bek”, “Umid”, “Kamolot” jamg’armalari yoshlarimizning zamonaviy bilimlarini egallashiga, iqtidorli bolalarni har jihatdan qo’llab-quvvatlashga, ularning chet ellarda tahsil olishiga ko’maklashib kelmoqda.

Sahnaga kirib kelgan Vatan posbonlari o’z harbiy-jangovar mahoratlarini muntazam oshirib borayotganlarini qo’shiq va lavhalar vositasida ifoda etdilar. Chunki xalqimizning osoyishta mehnat qilishi uchun shart-sharoit yaratib, mamlakatning hududiy yaxlitligini saqlash, Vatanni turli yovuz kuchlardan himoya qilish har qanday mustaqil davlatning muqaddas burchidir.

1998 yil “Oila yili” deb e’lon qilindi. Chunki davlatimiz mustaqilligi har bir oilaning baxtli bo’lishiga bog’liqdir.

Oilalarning, har bir fuqaroning turmush sharoitini yanada yaxshilashga qaratilgan davlat dasturi xuddi shu yili qabul qilindi va amalga oshirila boshlandi.

Ozod, adolatli, ma’naviyatli, erkin bozor iqtisodi, demokratiya qonun-qoidalari hamda sharoitlarida harakat qiluvchi jamiyat barpo qilish, o’z qadr-qimmatini anglaydigan, irodasi baquvvat, imoni butun, hayotida aniq maqsadi bo’lgan insonlarni tarbiyalab yetishtirish kabi dolzarb masalalar davlat siyosatining diqqat markazida bo’ldi.

Vatanimiz ziyolilari bayramning mazmundor, tarbiyaviy ahamiyati katta bo’lishi uchun butun kuch va imkoniyatlarini ishga soldilar.

Bayram tantanalarida “Sab’ai sayyor”, “Oila – mamlakat tayanchi”, “Yetuklik yo’llarida”, “Bahodirlar yurti bu”, “O’zbekiston guldastasi”, “San’atim – saodatim” kabi mavzular orqali mustaqil, obod Vatanimizning saodatli buguni va porloq kelajagini madh etuvchi asarlar ijro etildi.

Jumladan, “Sab’ai Sayor” kompozitsiyasi Alisher Navoiyning “Sab’ai sayyor” asari asosida tayyorlangan sahna tomoshasi bo’lib, unda yetti iqlim, yetti qasr tasviri va yetti malika raqsi ko’rsatildi. Bu bilan o’zbek davlatchiligining 3000 yillik tarixiga sayohat qilindi va Xorazm davlati siyosi ko’z-ko’z qilindi.

“Oila – mamlakat tayanchi” lavhasida sho’x bolajonlar o’z san’atlarini namoyish etishdi.

“Yetuklik yo’llarida” deb nomlangan qismda ko’plab sport turlari: milliy kurash, boks, tennis va boshqalarni aks ettiruvchi tomoshaviy sahnalar ko’rsatildi. O’zbekistonning mashhur sportchilari, chempionlar nomlari maydonda o’qib eshittirildi.

Bayram yakunida xalqimizning fidokona mehnati natijalari, Vatan ravnaqi, el-yurt obodligi yo’lidagi tinimsiz intilishlari rang-barang vositalar yordamida yoritib berildi.

счетчик посещений